CAGAYAN DE ORO CITY – Mapalig-on pa ang pagdumala sa aspetong administratibo,operasyonal ug teknikal sa Misamis Oriental II Electric Cooperative Incorporated/MORESCO 2 nga nakabase sa lungsod sa Medina,Misamis Oriental.
Kini human hingpita sa National Electrification Administration/NEA ang katudluan ni Edna Putian-Diango,JD sa pagsilbing bag-ong general manager sa MORESCO 2 nga pila ka bulan niya nga gidumala.
Mismo si NEA Deputy Administrator Atty. Omar Mayo ang mipahurar kang Diango sa bag-ong tahas sulod sa headquarters sa MORESCO 2 sa Medina ning lalawigan.
Si Diango ang dugay usab nga nagsilbing performing institutional services department manager sa MORESCO 1 nga nakabase sa Laguindingan,Misamis Oriental ayha nagsilbing officer-in-charge sa MORESCO 2 tungod sa daghang isyu nga gipang-atubang.
Gitimbaya sa duha ka MORESCO offices ang katudluan ni Diango ug gihinaut nila nga mahatag ang mga batakang serbisyo nga gikinahanglan sa mga konsimidoris nga nakabase sa sidlakang bahin sa Misamis Oriental.
Hisayrang kanunay’ng isyu nga singgit sa katawhan ngadto sa MORESCO 2 ang mga sunod-sunod nga power cutoff ug mahal nga balor sa koryente sukwahi sa MORESCO 1 nga multi-awardee gumikan sa ilang nahatag nga serbisyo sa mga konsumante.
