Dugang nga oportunidad sa trabaho ug preskong prutas gikan sa Europa sa dili dugayng panahon mapahimulosan na sa mga Pilipino, samtang gipahayag ni Polish Agriculture and Rural Development Minister Stefan Krajewski nga mahimo nang masulod sa nasod ang ilang mga sikat nga mansanas human sa mga bilateral arrangement karong 2026 o 2027.
Nunot niana, mas gihugtan pa sa Poland ang ilang interes nga mag-import usab og mga preskong mangga ug abokado gikan sa Pilipinas aron mapadako ang patigayon tali sa duha ka nasod.
Labi pa niini, gibutyag sa maong opisyal nga dako ang pagtahod sa ilang mga employers sa mga trabahador nga Pilipino tungod sa ilang disiplina ug kahibalo sa Ingles, hinungdan nga giablihan usab ang mga oportunidad sa trabaho sa agrikultura ug food-processing didto sa Poland.
Gilaoman nga mas mapalapdan pa ang maong panag-uban sa negosyo sa dihang mobisita sa Manila ang Presidente sa Poland nga si Karol Nawrocki sa umaabot nga Oktubre aron makigkita sa liderato sa atong nasod.
