Nagka-uyon ang International Labour Organization (ILO) nga sagupon ang labing unang global standards sa trabaho aron mahatagan sa katungod sa suholan, kaluwasan, ug benepisyo ang mga “gig worker” sama sa mga drivers ug food delivery riders.
Bisan pa niana, kinahanglan pa kini nga aprubahan ug ipatuman sa nagkadaiyang mga gobyerno sa kalibutan.
Pipila ka mga nasod sama sa China, Japan, ug Germany ang nibotar pabor niini, samtang ang United States ug New Zealand mibotar batok sa maong kasabutan.
Matod pa sa US, ang estrikto kaayong mga lagda mamahimong makababag sa inobasyon ug makadaot hinuon sa mga mamumuo.
Mahibaloan nga giisip kini sa mga rights groups ug union isip usa ka dako ug makasaysayanong lakang aron maprotektahan ang minilyon ka mga mamumuo batok sa giingong pagpang-abuso ug ubos nga suholan. (riza budlao)
