CAGAYAN DE ORO CITY – Kasuhan sa pagsupak sa Dangerous Drugs Act of 2002/Republic Act 9165 ang aktibong brgy konsehal kuyog ang motorcab driver sa piskalya sa Lanao del Norte.
Kini human nabingwit sa mga operatiba sa Philippine Drug Enforcement Agency-Misamis Occidental Provincial Office ang high value target nga government official nga si alyas Nomari,41 anyos nga kagawad sa Brgy Mama-anon ug si alyas Al Haire ,32 anyos nga managsama nagpuyo sa lungsod sa Salvador sa maong probinsya.
Gibutyag ni PDEA 10 regional director Alex Tablate nga nakuha sa ilang tropa gikan sa mga dinakpan ng 500 gramos sa gitoohang shabu nga adunay bana-banang kantidad sa 3.4 milyones pesos.
Siya miingon nga napasayon ang pagsignit sa mga dinakpan tungod sa pag-abag sa mga operatiba sa PDEA-Lanao del Norte ug Kapatagan Municipal Police Station dihang gikasa ang drug buy bust operation sa Kapatagan Town Center,Brgy Población sa nahisgutang lalawigan.
Gawas sa droga,nabawi ang orihinal nga balor sa libo ka pesos nga salapi nga buy-bust money ug ang binandol nga pekeng salapi nga gigamit sa negosasyon.
Detinado ang mga dinakpan sa mini-cell sa PDEA ug naghulat nga itugyan sa regular jail aron atubangon ang kaso nga ilang nasupak.(Pictures: Navarro,Mike).
