Nakapili na ang mga prosecutor sa International Criminal Court (ICC) og tolo ka medical experts nga muhimo sa lawom nga ebalwasyon sa kahimtang sa panglawas ni kanhi Presidente Rodrigo Duterte.
Ang panel gilangkoban sa mga espesyalista sa behavioral neurology, neuropsychology, ug forensic psychiatry, nga gikatakdang mosuta kung si Duterte ba angayng itugot nga moapil sa mga hearing sa ICC.
Base sa siyam ka pahina nga resolusyon nga gipagawas sa Office of the Prosecutor ug pirmado ni Deputy Prosecutor Mame Mandiaye Niang, gisuportahan ang pagmugna sa multidisciplinary panel aron masiguro ang hustong proseso sa pag-assess sa pisikal ug mental nga kapasidad sa kanhi presidente.
Giklaro usab sa dokumento nga ang maong lakang tubag sa alegasyon sa depensa nga adunay “bias” ang pagpili sa mga eksperto, tungod kay wala hatagi og pag-aprobar nga ang medical officer sa ICC ang mo-assess kang Duterte.
Gipasabot sa prosekusyon nga ang medical officer sa detention facility walay igong kasinatian sa judicial assessments, busa gikinahanglan ang mga eksperto nga adunay tukmang kahibalo sa legal ug medikal nga aspeto sa kaso.
