CAGAYAN DE ORO CITY – Gitunol ni Dept of Agrarian Reform Secretary Conrado Estrella III subay sa kamanduan ni Pres Bongbong Marcos ang mga titulo sa yuta ug certificates of condonation and release of mortgage sa 5-mil 700 ka benepesaryo sa agraryong reporma sa Northern Mindanao.
Gihimo kini atol sa DAR’s stakeholders forum nga gitambungan sa mismong mga mag-uuma gikan sa rehiyon ug ubang govt partners sa Atrium,Limketkai Mall sa syudad kagahapon sa buntag.
Miingon si Estrella nga walay laing tahas nga gihatag si Marcos kanila nga mapadali ug mapaspasan ang pagtunol sa mga kaugalingong titulo sa mga yuta sa mga mag-uuma nga benepesaryo sa programang agraryo sa nasud.
Una usab niini,gipaabot ni House Deputy Speaker Bambi Emano ang mensahe sa mga mag-uuma nga wala pasagdi sa administrasyon ang programang agraryo kay nagsilbi lamang kining sumpay sa nasugdan kaniadto ni late Pres Ferdinand Marcos Sr ug late DAR Secretary Conrado Estrella Sr nga mga amahan ni Marcos Jr ug Estrella III.
Siya miingon nga katumanan sa dugay’ng damgo sa kaliwat-tabunon nga mahatagan sa kaugalingong yuta.Kini tungod kay pinasakit nga kamatuoran nga nahimugso sa kaulingong nasud ang kaliwat-Pilipinhon apan tawgon lang nga mga ‘iskuwater.
‘Dumduman nga bisan sila Estrella ug DAR Asst Secretary Jenil Demorito kinsa dugay’ng taas nga opisyal usab sa Bombo Radyo Philippines Network ayha nag-serbisyo sulod sa gobierno ang nakadayeg sa mensahe ni Emano alang sa mga mag-uuma.
Kini ilabina nga nasampit sa kongresista nga ang paghatag sa gobierno sa mga yuta ang usa ka pagpalig-on sa dignidad sa mga mag-uumang-Pilipinhon.
Hisayrang taliwala sa kaguliyang-politika sa kauluhan,pabiling naka-sentro sa ilang trabaho ang DAR ilabina ang pagpadali nga mahatagan sa mga titulo sa mga yuta ang daghang mag-uuma sa nasud.
