Gibatikos ni Bise Presidente Sara Duterte ang Malacañang tungod sa pag-host sa party samtang miigo ang bagyong Tino sa Pilipinas.
Ang maong kalihokan gitambongan ni First Lady Liza Araneta-Marcos.
Una nang gidepensa ni Presidential Communications Office Undersecretary Claire Castro ang Unang Ginang, ug namugos nga ang panagtapok opisyal nga kalihokan ug dili lang kay pagsul-ob sa costume sama sa giingong “Snow White party” nga gipasabot sa costume ni Duterte sa iyang pag-apil sa Halloween.
Miresbak ang Bise Presidente kang Castro ug mi-ingon nga walay labot ang iyang costume sa pagtubag sa isyu sa pagsaulog samtang daghang katawhan ang nag-antos tungod sa bagyo.
Miingon si Duterte nga dili usab angay nga ibalhin sa laing isyu ang atensyon aron tabunan ang sayop sa Palasyo.
Mahinumduman nga mitambong ang Unang Ginang sa book launch sa “Philippine First Ladies’ Portraits” ug sa Goldenberg Concert Series nga gipahigayon sa Malacañang niadtong Nobyembre 6 ug 7.
