Nanawagan alang sa dayalogo ug pagpugong, ang bag-ong Ambassador sa China sa Pilipinas nga si Jing Quan.
Gipamugos ni Jing nga ang panaglalis bahin pag-angkon ug tinood nga nanag-iya sa katubigan sa South China Sea sa China, ug West Philippine Sea sa Pilipinas, kinahanglan dili magdiktar sa kinatibuk-ang relasyon sa duha ka nasud
Sa usa ka press conference, si Jing miingon nga siya nagtinguha sa pagpalig-on sa relasyon tali sa duha ka mga nasud ug pagdumala sa mga kalainan pinaagi sa dayalogo. Siya miingon nga ang duha ka panig adunay katakus ug kaalam sa pagsulbad o pagdumala sa mga tensyon, sama sa gibuhat sa China sa ubang mga silingang nasud.
Iya usab nga gibutyag nga ang mga diplomat gikan sa duha ka nasod nakab-ot na sa pasiunang kasabotan alang sa sunod nga hugna sa dayalogo, ug siya naglaum nga ang negosasyon sa usa ka Code of Conduct sa mga katubigan nga gilantugian mapadali karong tuiga samtang ang Pilipinas maoy naghupot sa ASEAN Chair.
Gipamugos ni Jing nga ang isyu sa maritime usa lamang ka aspeto sa mas lapad nga relasyon, lakip ang pamatigayon, imprastraktura, ug enerhiya. Matod niya ang China nagpabiling pinakadakong trading partner sa Pilipinas ug bukas kini sa mas daghang produkto sa Pilipinas. Dugang pa sa embahador nga dili kinahanglang mopili ang Pilipinas tali sa China ug Estados Unidos, tungod kay aduna kini maayong relasyon sa duha ka nasod alang sa dugay nga interes sa katawhan.
