Mipasa ang 21st City Council sa Cagayan de Oro og usa ka resolusyon nga naghangyo sa Department of Public Works and Highways (DPWH) nga temporaryong isuspende ang ginahimong overpass project daplin sa Masterson Avenue sa Uptown CDO, niadtong Lunes.
Ang resolusyon gipangulohan ni Councilor Enrico Salcedo, chairman sa Committee on Public Utilities, human sa iyang special report kalabot sa isyu atol sa hapon nga sesyon sa konseho.
Matud ni Salcedo, ang nagpadayon nga konstruksyon sa overpass nakasira og usa ka lane matag kilid sa unom ka lane nga Masterson Avenue, hinungdan sa grabe nga traffic congestion, ilabi na sa buntag ug hapon nga peak hours.
Ang resolusyon gitumong ngadto sa Secretary sa DPWH, ug gipadalhan usab og kopya ang regional director ug district engineer sa ahensya.
Gipahayag ni Councilor Salcedo nga giimbitar sa konseho ang mga opisyal sa DPWH ug district engineers aron hisgutan ang mga posibleng solusyon nga makapamenos sa kalisod ug traffic nga masinati sa mga motorista ug komyuter sa maong lugar. (James Oliver)
