Pagmanipular sa presyo sa merkado ug pag-inisyar sa “insider’s trading”.
Kini ang duha bug-at nga kalapasan sa gi-akusar sa Securities and Exchange Commisson (SEC) aron pasakahan sa kasong kriminal sa Department of Justice (DOJ) ang nanag-iya sa Golden MV Holdings Inc..
Subay sa report nga gisumiter sa SEC, nadiskobrehan ang sobra ka taas nga datos sa assets ug kita aron ilaron ang publiko sa artipisyal nga pagsaka sa presyo sa ilang stocks.
Namahayag ang ahensya nga gipakita sa Villar Land nga sila adunay kapin sa ₱1.33 trilyon nga assets ug ₱999.72 bilyon nga net income sa 2024. Apan sa aktuwal nga audited financial statements, anaa lamang sa ₱35.7 bilyon ang total assets.
Kini nagpasabot nga adunay 97% nga kibhang sa salapi nga ilang gideklarar sa gobyerno, ug ang mas taas nga kantidad mao ang ilang gigamit nga data aron makapangilad sila sa mga investors. Lakip sa mga gipasakaha’g kaso sila ex-Senate President Manny Villar Jr., iyang kapikas nga si ex-Sen. Cynthia Villar, ug ilang mga anak nga sila Senators Camille ug Mark Villar.
Gawas niini, namugos ang SEC anga accountable usab ang ubang mga opisyales sa ilang kompanya busa lakip sila sa gikasuhan ug respondents gi-file nga reklamot sa SEC sa DOJ. Hisayran nga dinhi sa Pilipinas ang real estate nga gipanag-iyahan sa Villar Family maoy usa sa pinakadakong grupo ug impluensiyado sa sektor sa real estate.
