Gibutyag sa Streetlight: Suga sa Dalan Organization Inc. nga misaka ang ihap sa mga batan-on nga nalambigit sa prostitution sa dakbayan.
Sumala ni Streetlight Administrator Marion Soriano, adunay pipila ka mga barangay ang ilang natala kundiin, daghang mga batan-ong ilang na-rescue gikan sa mga bugaw.
Giila ni Soriano ang mga lugar sama sa Coastal Road ug Divisoria isip pipila sa mga dapit diin kasagarang gihimo ang transaksyon sa pagpamugaw.
Bisan pa sa curfew nga gipatuman sa syudad, gihangyo sa grupo ang mga concerned agencies ug ang lokal nga kagamhanan nga mas palig-onon pa ang implementasyon niini aron malikayan nga ang mga batan-on maglatagaw sa kadalanan matag gabii ug madani o marecruit sa ilegal nga buhat.
Gisugyot usab sa grupo ang kanunay ug “minuto-minutong” roving sa mga dalan, tungod kay namatikdan nga daghang batan-on ang mogawas sa ilang mga panimalay kung makabantay nga nahuman na ang roving sa kapulisan.
Gihangyo usab nila ang mga barangay-LGU nga ipadayon ang night roving sa mga tanod, ug i-rescue ang bisan kinsang batan-on nga makitang naglatagaw pa sa kadalanan sa gabii.
Dugang pa, ilang gihangyo nga ipasang-at ang maong mga bata sa ilang mga ginikanan aron maedukar sila sa posibleng hulga ug peligro nga ilang maatubang kung magpadayon sa paglatagaw sa gabii.
