NAGPAGULA OG RAPID ASSESSMENT ang buhatan sa City Agriculture Office alang sa mga mag-uuma ug mananagat nga naapektuhan sa Bagyong Basyang.
Sumala ni Engr. Bernie Daba, City Agriculture Manager, daghan na silang nadawat nga mga report gikan sa coastal areas sa syudad, diin daghang bangka, fish cage, ug uban pang kabtangan sa mga mananagat ang naguba atol sa paglabay sa bagyo.
Sa laing bahin, daghan usab nga pananom ang nangaguba sa mga hinterland barangays sa syudad, lakip ang mga pananom sama sa cracked corn ug nagkalain-laing klase sa gulay, nga maoy panginabuhian sa mga mag-uuma.
Butyag ni Daba, nagpadala na sila og mga Barangay Agricultural Station workers aron masuta ug ma-assess ang kahimtangan sa mga naapektuhan, lakip na ang aktuwal nga damage ug reported losses sa mga kabtangan tungod sa bagyo, aron matino ug mahatagan dayon og hustong tabang ang mga apektadong sektor. (James oliver)
