Gitin-aw sa city psychologist nga si Rio Rosal Baliling ang papel sa oxytocin o mas nailhan isip “love hormone” nga kasagarang nalambigit sa pagbati sa gugma ug kalipay, ilabi na ning Valentine’s Day. Sumala ni Baliling, ma-release ang oxytocin kung ang mga tawo nga nagkahigugmaay magyakap, maggunitay, o magkonektar sa usa ka consensual ug respetadong pamaagi. Matod pa niya, ang maong hormone makatabang sa pagpalig-on sa pagsalig, bonding, ug social attachment tali sa mga tawo. Dugang pa ni Baliling, mas sayon nga ma-release ang oxytocin kon ang usa ka tawo anaa sa usa ka healthy ug maayong romantikong relasyon. Apan gipatin-aw usab niya nga dili kinahanglan nga adunay pares ang usa ka tawo aron makabati niini.Matod pa sa city psychologist, ang paghigugma ug pagpangga sa kaugalingon, sama sa pag-atiman sa mental ug emosyonal nga kahimtangan, makahatag gihapon og oxytocin ug makatampo sa kahimsog sa panghunahuna.Busa, sa niining Valentine’s Day, gihangyo ni Baliling ang katawhan nga palapdon ang pagsabot sa gugma nga dili lang limitado sa romantikong relasyon, kondili apil usab ang gugma sa kaugalingon ug sa uban.
