Dead on arrival sa ospital ang mag-apohan nga si Julito Lood Sercolado, 50-anyos, ug ang iyang menor de edad nga apo nga si Kylie Sercolado Morales human mabundolan sa sakyanan ug nalatayan sa usa ka tanker truck sa Bulua-Igpit Diversion Road sa Cagayan de Oro kagahapong adlawa. Sumala ni Traffic investigator PCMS Charles Cee A. Ebueza sa Traffic Enforcement Unit sa Region X, ang aksidente nahitabo human nga mabundolan sa motor nga gi drivan sa mga biktima ang yamata motor nga nag-una niini, hinungdan sa pagkalagpot ug pagkahulog sa duha ka biktima. Sa dihang nahulog, nalatayan sila sa tanker truck nga nagsunod sa likod, nga nagresulta sa pagkamatay sa mag-apohan.Sa pagkakaron, anaa na sa usa sa mga funeral homes ang mga patayng lawas sa mga biktima samtang gikustodiya na sa kapulisan ang driver sa tanker nga si Bernabe Banales, 71-anyos ug lumad nga residente sa Laguna City. Matod ni Ebueza, posibleng pasakaan og kaso nga Reckless Imprudence Resulting in Homicide and Damage to Property ang driver kon magpasaka og reklamo ang pamilya sa mga biktima.Sa maong hitabo gipahimangnoan usab sa kapulisan ang publiko nga mag-amping sa kalsada ug sundon ang mga traffic rules aron malikayan ang susamang trahedya.Padayon ang imbestigasyon aron matino ang tibuok kahimtangan sa disgrasya, lakip ang posibleng kontribusyon sa driver, kondisyon sa tanker truck, ug sa duha ka motor, aron masiguro ang hustisya alang sa mga biktima ug pamilya niini. (James Oliver)
