NAMALANDONG ang mga miyembro sa Duterte Diehard Supporters o DDS sa kasamtangang kahimtang ni kanhi Pangulong Rodrigo Duterte didto sa International Criminal Court sa The Hague, Netherlands.
Sumala ni Mindanao Parallel President Lecera Benly, human sa pag-waive ni Duterte sa iyang katungod may kalabotan sa confirmation of charges hearing sa ICC, wala kini nagpasabot nga nawad-an na og paglaum ang mga supporters ni Duterte.
Matod ni Benly, nagpadayon gihapon ang ilang pagsalig ug suporta sa kanhing pangulo, apan ilang gipasiugda nga angay usab hatagan og igong respeto sa korte ang edad ug kahimtang panglawas ni Duterte.
Gipunting pa niya nga dili na unta dugangan og kahasol o stress ang kanhing presidente, ug respetohon sa korte ang iyang kahimtang, sama sa iyang pagpakita og pagtahod sa proseso sa balaod.
Sa pagkakaron, padayon ang legal nga proseso nga ginahimo sa ICC samtang nagtan-aw ug naghulat ang mga supporters sa sunod nga mga kalamboan sa kaso. (James Oliver)
