GISAWAY ni Naneth Castillo, inahan sa usa ka drug war victim, ang pahayag ni kanhi Pangulong Rodrigo Duterte nga giingong “himo-himo” lamang sa iyang mga political opponents ang mga extrajudicial killings o EJK nga may kalabotan sa iyang kampanya kontra droga kaniadto.
Matod ni Castillo, kung tinuod man nga politika ra ang tanan, nganong nadamay ang mga ordinaryong katawhan ilabi na ang mga kabus nga pamilya sama sa ila.
Iyang gipadayag ang kasuko ug kasakit isip ginikanan nga nawadan og anak tungod sa operasyon nga may kalabotan sa war on drugs.
Dugang pa niya, dili angay gamiton ang mga biktima isip sakripisyo aron mapanalipdan o mapahumot ang ngalan sa bisan kinsang lider. Alang kaniya ug sa ubang pamilya nga adunay miyembro nga namatay sa kampanya kontra droga, tinuod ug personal ang ilang kasinatian.
Sa laing bahin, gikondena sa mga pamilya sa drug war victims ang ilang gihulagway nga sayop nga pamaagi sa miaging administrasyon.
Nagpabilin silang determinado sa pagpangayo og hustisya ug miingon nga dili sila motuo nga politika lamang ang tanan nga nahitabo sa maong kampanya.
Padayon ang panawagan sa nagkalain laing grupo alang sa hustisya samtang nagpabilin usab nga mainit ang diskusyon sa publiko kabahin sa isyu sa war on drugs.
