GIPANAWAGAN ni City Councilor Datu Roberto Cabaring, Indigenous Peoples representative sa Cagayan de Oro City Council, ang publiko nga sundon ang husto ug respetadong paggamit sa mga tradisyunal nga indigenous attire. Sa iyang special report atol sa regular session sa konseho kagahapong adlawa, giingon ni Cabaring nga kinahanglan magbutang sa klarong guidelines kabahin sa paggamit sa lumad nga bisti tungod sa nagkadaghang kaso sa sayop o dili angay nga paggamit niini sa bag-ong mga uso. Si Cabaring, nga maoy chairperson sa committee on cultural communities sa konseho, mipasiugda nga ang indigenous clothing dili lamang ordinaryong sinina kondili simbolo sa dignidad, identidad ug kasaysayan sa matag komunidad. Sa laing bahin, sumala sa National Commission on Indigenous Peoples o NCIP-Caraga, ang bisan kinsa nga magsul-ob og tradisyunal nga indigenous attire ug mga aksesorya kinahanglan una mangayo og pagtugot o konsent sa hingtungdan nga komunidad ug siguruhon nga kini gamiton sa husto ug respetadong konteksto. Dugang pa ni Cabaring, adunay katungod ang mga indigenous communities sa pagbuot unsaon paggamit sa ilang tradisyunal nga bisti. Busa, iyang gipasiugda ang kahinungdanon sa pagkonsulta sa mga tribal elders ug pagpatuman og klarong patakaran aron malikayan ang kalibog ug dili pagsinabtanay sa umaabot. -James Oliver
