Gilauman nga magsugod ang Senate Committee on Ethics sa paghisgot sa mga reklamo batok sa mga senador sa Marso 4, 2026, nga ipahigayon sa Conference Room sa Presidente sa Senado.
Sa maong executive session, hisgutan ang pag-aprubar sa mga lagda sa komite ug ang unom ka nahibiling ethics complaints, lakip na ang kaso batok ni Senador Ronald “Bato” dela Rosa tungod sa taas nga rate sa pag-absent.
Ang komite mosunod sa prinsipyo nga “first in, first out” aron masiguro ang patas ug organisadong pagproseso sa mga kaso.
Gisaad usab nga ang proseso magpabiling transparent ug patas aron malikayan ang mga alegasyon sa paboritismo ug kalibog sa publiko. (Jane Abulag)
