GIPAHIBALO sa Night Market Management Committee ang temporaryong pagsuspinde sa night market sa Guillermo Street sugod Marso 9 ning tuig human kini nasabutan ug naaprobahan sa miting niadtong Pebrero 19.
Sumala ni Janboy Actub, tigpamaba ni City Mayor Rolando Klarex Uy, sakop sa suspensyon ang bahin sa Guillermo Street gikan sa Hayes Street padulong sa JR Borja Street.
Butyag niya nga gihimo ang maong lakang tungod sa nagkagrabeng kagubot sa lugar nga miresulta sa paghuot sa trapiko, pagsulod sa mga dili awtorisadong vendors, pagpamaligya gawas sa gitugot nga oras, ug dili pagsinabtanay tali sa mga namaligya.
Gisaysay usab nga wala pa’y gitakdang petsa alang sa pagbalik sa operasyon sa night market.
Ang panahon sa suspensyon pagagamiton sa pagpahigayon og flushing ug halapad nga pagpanglimpyo sa maong dalan aron mapasig-uli ang kahapsay ug kahinlo sa lugar. (Jane Abulag)
