Gisaway ni kanhi Misamis Oriental Vice Governor ug economist nga si Joey Pelaez ang sitwasyon nga mas barato pa ang pagbiyahe paingon sa gawas sa nasud kumpara sa domestic travel sulod sa Pilipinas.
Sa iyang panayam sa Bombo Radyo, matod ni Pelaez nga usa kini sa mga hinungdan ngano nga ang ubang langyaw nga turista dili mopili sa Pilipinas isip destinasyon tungod sa kamahal sa travel expenses ug mga palitonon, nga nakaresulta sa ubos nga tourist arrivals.
Dugang pa niya, sa gilaumang pagsaka sa presyo sa lana karong adlawa tungod sa padayong tensyon sa Middle East, posible nga dili lamang ang produktong petrolyo ang mosaka ang presyo.
Gipasabot sa ekonomista nga mahimong mosunod ang domino effect sa presyohan sa mga palaliton sa nasud, lakip ang plite sa transportasyon ug bayranan sa kuryente, gumikan kay dako ang papel sa lana sa adlaw-adlaw nga panginabuhi ug operasyon sa negosyo.
Busa, naghinaot si Pelaez nga matapos na ang kagubot sa Middle East aron mabalik sa normal ang sitwasyon sa ekonomiya ug malikayan ang dugang nga pagsaka sa presyo sa mga batakang panginahanglanon. (James Oliver)
