Gideputized sa Office of the Ombudsman ang National Bureau of Investigation (NBI) aron susihon ang mga alegasyon sa 18 ka kanhi marines ug miyembro sa Philippine Navy.
Gibutyag ni NBI Director Atty. Melvin Matibag nga gitudlo sila ni Ombudsman Jesus Crispin Remulla nga mag-imbestigar kon tinuod ba ang akusasyon nga sila ang “bag-men” ni kanhi Ako Bicol Partylist Representative Zaldy Co, ug sila ba ang naghatod sa mga maleta nga puno sa kwarta ngadto sa mga dagkong opisyal sa gobyerno.
Lakip sa giingon nga nakadawat sa maong maleta sila President Ferdinand Marcos Jr., kanhi Speaker Martin Romualdez, si Co, kanhi Senador Antonio Trillanes, ug uban pang kongresista, base sa mga hulagway nga gipresentar isip ebidensya sa mga nag-akusar.
Alang kang Matibag, seryoso ang mga alegasyon ug iyang gisaad nga hatagan nila ug igong panahon ang pagsusi sa tanan nga dokumento nga gipresentar.
Lakip niini ang pag-ila sa personal nga background ug kredibilidad sa mga reklamante.-
