Padayon ang pagselebrar sa National Women’s Month karong bulan sa Marso sa tibuok nasud ilawom sa temang “WE for Gender Equality and Inclusive Society,” nga nagpunting sa pagpalig-on sa papel sa kababayen-an sa katilingban.
Sa interbyu sa Bombo Radyo, gipalawom ni Sol Paeste-Mosqueda sa Gender and Development Office sa lokal nga panggamhanan sa Cagayan de Oro nga ang maong selebrasyon alayon sa mandato sa balaod nga i-ehersisyo ang gender equality, ilabi na sa kababayen-an nga hangtod karon nakasinati gihapon og diskriminasyon ug ubos nga pagtan-aw.
Matod niya, makita kini ilabi na sa paghisgot sa pagdumala og bug-at nga responsibilidad sama sa paghawid og posisyon sa gobyerno, pagnegosyo, ug aktibong pag-apil sa pagpalambo sa nasud, diin usahay gilantaw ang babaye nga disbintaha kumpara sa lalaki.
Busa, nanawagan ang GAD sa paghatag og patas nga oportunidad ug pagtan-aw sa abilidad sa matag usa, dili base sa gender kondili sa kapasidad ug kahimtang.
Hisayran nga sugdan ang kick-off sa serye sa mga kalihokan alang sa Women’s Month karong umaabot nga Biyernes pinaagi sa usa ka misa, nga pagasundan sa nagkadaiyang aktibidad sulod sa tibuok bulan. (James Oliver)
