DUDA si kanhi city councilor ug international law expert nga si Atty. James Judith sa kredibilidad sa pahayag ni Jesus Crispin Remulla nga ang delivery sa giingong malemaletang kwarta nahitabo pa sa panahon ni kanhi Presidente Rodrigo Duterte.
Miingon si Judith nga lisod tuohan ang usa ka opisyal nga gustong pakasuhan ang usa ka tawo bisan siya mismo ang gitahasan sa balaod isip Ombudsman nga motimbang kung ang kaso angayan ba ipaabot sa Sandiganbayan.
Matod sa abogado nga mahimong ma-question ang impartiality sa Ombudsman tungod kay siya ang adunay papel sa pagdesisyon kung adunay basehan ang kaso nga isaka sa anti-graft court.
Dugang pa niya nga mahimong 50-50 ang pagsalig sa publiko sa maong pahayag tungod sa posibilidad nga adunay bias sa pulong sa Ombudsman tungod kay kaalyado kini sa kasamtangang administrasyon.
Giingon ni Judith nga posibleng adunay mga magduda nga milihok lamang ang Ombudsman pabor sa iyang gidapigan sa maong isyu. (By James Oliver)
