Giklaro ni Public Order and Safety Chairman Councilor Roger Abaday nga walay koneksyon sa kasamtangang tensiyon tali sa United States, Israel ug Iran ang pag-abot sa mga United States Marine Corps sa Cagayan de Oro aron magpahigayon og training activities.
Matod ni Abaday nga wala sa Lumbia Air Base nagpabilin ang mga US Marines, kondili naka-check in kini sa pipila ka hotel sa syudad samtang nag-andam sa ilang mga kalihokan sa lain-laing lugar sa Northern Mindanao.
Gipasabot niya nga kabahin sa ilang aktibidad ang pag-apil sa mga training exercises sa Bukidnon ug sa pipila ka lugar sa dakbayan.
Gipanghimakak usab ni Abaday ang mga nagkatag nga impormasyon nga ang maong training may kalabotan sa posibleng pagpadala sa mga sundalo sa Israel, ug giingon nga ang ilang buhaton mao lamang ang mga military drills sama sa beach landing exercises sa mga natudlong lugar.
Dugang pa niya nga nagpadayon ang koordinasyon sa kapulisan ug sa ubang concerned agencies aron masiguro ang kahusay ug kalinaw sa syudad samtang ginahimo ang mga aktibidad sa mga langyaw nga sundalo.
Gipasiguro ni Abaday nga ginamonitor sa lokal nga gobyerno ang maong mga kalihokan aron malikayan ang kalibog ug masiguro ang kaluwasan sa mga residente sa Cagayan de Oro. (By James Oliver)
