Gikompirmar sa Police Regional Office-10 ang dakung kalampusan nga nahimo sa Regional Police Drug Enforcement Unit (RPDEU) Team 2 human nila madakpan ang duha ka suspek nga namaligya sa ilegal nga druga sa kantidad nga P20.4-Milyon sa Sitio Lambago, Barangay Lapasan, ning syudad.
Namahayag si PRO-10 Spokesperson Police Major Joann Navaro nga gikonsiderar sa mga operatiba nga pulos High Valued Individual (HVI) ang mga suspek nga naila sa alyas Bossing ug Alyas Jun, pulos hingkod ang edad.
Mukabat sa 30 kilo sa sinako nga girepak nga shabu ang narekober sa duruha.
Dugtong niini, gibutyag ni Navarro nga mitug-an ang usa sa mga suspek nga ang ilang contact ug supplier sa binulto nga druga mao ang usa ka PDL (Person Deprived with Liberty).
Gitug-an usab sa mga dinakpan nga gikan sa Marawi City ang supply sa droga nga naka-abot sa syudad. Lakip sa ilang modus mao ang mag-arkila sa motor sa managlahing lugar alang sa ilang delivery.
