Mas pabor ang BUKTRAMCO Cooperative sa pagdala sa mga isyu sa transport sector sa lamesa kaysa sa ipahigayong tigil pasada karong Lunes.
Sumala ni Chairman Melvin Erederos, mas epektibo nga hisgutan ang problema pinaagi sa dayalogo kay kung ipahigayon sa kalsada, mahimong makadugang kini sa kalisod sa publiko ilabi na sa mga komyuter.
Gipasabot niya nga ang ilang baruganan mao ang pagpangayo og tabang sa mga ahensya sama sa LTFRB ug DOTR aron madala ang isyu ngadto sa Kongreso ug Senado aron matan-aw ang posibilidad sa executive order o lain pang lakang batok sa pagsaka sa presyo sa petrolyo.
Dugang pa niya nga ang padayon nga pagtaas sa presyo sa diesel ug gasolina nakaapekto sa operasyon sa transport sector ug posibleng mosangpot sa dugang nga pag-antos sa katawhan kon walay tukmang solusyon.
Bisan pa sa kalisod, giingon ni Erederos nga dili angay ipasa sa mga pasahero ang bug-at nga epekto pinaagi sa aksyon sa kalsada, hinunoa kinahanglan ang kooperasyon sa gobyerno ug mga stakeholders aron malikayan ang dugang nga pagsaka sa plite ug palaliton.
Naglaum ang BUKTRAMCO nga pinaagi sa dayalogo ug koordinasyon, makab-ot ang usa ka long-term nga solusyon nga makabenepisyo sa transport sector ug sa kinatibuk-ang publiko.
