“Sa Senado ang husto nga trial!” Mao kini ang gipadayag ni Atty. Proculo Sarmen, former NLRC commissioner ug political expert, kabahin sa pag-convene sa Senado isip impeachment court.
Butyag sa abogado nga ang Senado karon pormal nang naglihok ubos sa ilang mandato sa Konstitusyon human madawat ang articles of impeachment gikan sa House of Representatives.
Dugang pa niini nga kinahanglan tarongon sa Senado ang preparasyon sa proseso, lakip na ang posibilidad sa pre-trial aron ma-organisa ang mga isyu ug malikayan ang kagubot sa presentasyon sa ebidensya ug argumento.
Gipasabot usab ni Sarmen nga ang duha ka kampo kinahanglan hatagan og patas nga kahigayonan sa cross-examination sa mga testigo ug sa pagsusi sa kredibilidad sa mga dokumento nga ipresentar.
Tataw usab nga giingon sa political expert nga importante nga mapadayon ang impeachment proceedings sa Senado aron matuman ang ilang katungdanan ug masiguro ang patas ug transparent nga paghusay sa kaso nga giatubang ni VP Duterte.
