Malampusong naluwas sa mga specialist divers ang unang lalaki gikan sa gibaha nga langub sa Xaisomboun Province, Laos, human didto natanggong og kapin sa usa ka semana uban sa iyang mga kauban nga nangita unta og bulawan.
Mikabat og 37 minutos ang operasyon aron mapagawas ang biktima gikan sa lalom nga agianan sa tubig.
Samtang luwas na ang unang biktima, upat pa ka tawo ang nakaplagang buhi apan nagpabilin pa kini sa sulod sa langub, ug duna pay laing duha nga padayong gipangita.
Gibutyag sa mga rescuers nga gipahunong una ang operasyon sa gabei aron sutaon ang kahimtang sa panglawas sa mga nabilin nga biktima nga matod pa nagkahuyang na samtang nagpaabot nga ma-evacuate.
Hisayran nga gilangkuban sa mga volunteers gikan sa nagkadaiyang nasod sama sa Thailand, Japan ug uban pa, diin giingong perwisyo ug nagkalisod ang operasyon tungod sa kahuot sa agianan nga nagkinahanglan og underwater diving. (riza budlao)
