Nagtuo si Defense Secretary Gilberto Teodoro nga ang posibilidad nga maparehas kasuod ang relasyon sa Pilipinas ug China sa kasamtangang relasyon sa nasod ngadto sa Japan magdepende sa direksyon sa kagamhanan sa China.
Sumala ni Teodoro, wala’y problema ang mga Pilipino sa mga katawhang Intsik, apan ang hagit anaa sa mga polisiya ug binuhatan sa gobyerno sa Beijing.
Gipasabot niya nga adunay kaugalingong pamaagi ang kagamhanan sa China sa tibuok kalibotan nga sagad dili mosunod sa mga lagda nga giila sa daghang kanasoran.
Tungod niini, gipahayag ni Teodoro nga lisod saligan ang maong nasod sa pagkakaron gawas nalang kung mag-usab ang ilang gobyerno ug magpakita og tiunay nga kamatinud-anon. (riza budlao)
