Gidason ni Senador Erwin Tulfo ang Senate Bill No. 2035 o ang “Free Professional Examinations Act” aron mahimong libre ang mga licensure exams alang sa mga kwalipikadong kabus nga Pilipino.
Ubos niini nga panukala, dili na pabayron og examination fees ang mga indigent examinees nga mokuha og bar, board, ug civil service exams aron matabangan silang makakuha og propesyonal nga trabaho.
Sumala ni Tulfo, daghang mga nakahuman sa pagtungha ang napugos na lang sa pagtrabaho og ubos nga posisyon tungod kay walay ikabayad sa maong mga exam.
Hisayran nga aron malikayan ang pag-abuso sa maong benepisyo, ang Department of Social Welfare and Development (DSWD) ang moila sa mga kwalipikadong aplikante, ug mahimo lamang kini gamiton kausa sa usa ka tuig. (riza budlao)
