Misaka pa sa 53.2 porsyento ang kinitaan sa eksport sa South Korea sa Mayo diin miabot kini sa rekord nga $87.75 bilyon tungod sa dako nga demand sa mga semiconductor o chips para sa Artificial Intelligence (AI).
Kani ang giisip nga pinakakusog nga tinuig nga pagsaka sa ilang eksport sukad pa niadtong Enero 1984, hinungdan nga nitala sab ang nasod og kinatas-ang rekord sa ilang “trade surplus” o kita sa pamatigayon nga mitala sa $26.95 bilyon.
Tungod niining maong kalamboan, misaka og mga duha ka porsyento ang ilang benchmark KOSPI stock index niadtong Lunes sa buntag ug nitala sa labing taas nga kasaysayan niini.
Mapasalamaton usab ang mga ekonomista nga mas molapas pa sa 2.6 porsyento ang pagtaas sa ekonomiya sa South Korea karong tuiga gumikan sa nagpadayong kakusog sa ilang pamatigayon sa gawas sa nasod. (riza budlao)
