Gidangpan na karon sa mga BTS fans sa Taiwan ang tradisyonal nga dios sa gugma nga si Yue Lao, sa paglaum nga matabangan silang makakuha og ticket sa umaabot nga concert sa Kaohsiung karong Nobyembre.
Imbis nga uyab o kapikas sa kinabuhi ang pangayoon, nagbaha ang mga batan-on sa mga templo dala ang mga photocard ug seating chart sa stadium isip ilang mga halad.
Sumala sa mga fans, nagsalig sila sa gituhuang “red thread of fate” sa maong dios aron masumpay ang ilang suwerte ngadto sa mga concert ticket taliwala sa grabeng kompetisyon sa pagpalit.
Kini nga trend misamot pa kasikat sa social media human ubay-ubay nga deboto ang nagpamatuod nga milusot gyud ang ilang mga ticket human sila nag-ampo sa templo.
Kini nga talagsaong lakang nagpakita lang nga andam mosalig ang mga K-pop fan bisan sa balaanong tabang, aron lang makita ang ilang mga paboritong bituon. (jane abulag)
