Nagpadayag og dakong pasalamat si Carlos Conde, ang Executive Director sa Truth Commission, ngadto kang PNP Chief Nartatez Jr. tungod sa pasalig niini nga makigkooperar ang kapulisan sa ilang gihimo nga imbestigasyon bahin sa mga patayan sa drug war.
Gidawat sa komisyon ang maong lakang ug andam silang maminaw sa mga opisyal sa balaod nga mosaksi, bisan pa kadtong gusto nga magpabiling tago ang tinuod nga identipikasyon alang sa ilang seguridad.
Gipasalig ni Conde nga usa sa mga nag-unang prayoridad sa komisyon mao ang paghatag og proteksyon ug kasigurohan sa mga biktima ug mga polis nga mosaysay sa ilang mga nasaksihan.
Sa pagkakaron, wala pa silay pinal nga listahan sa mga kapulisan nga paga-estoryahon apan aduna na silay inisyal nga listahan sa mga biktima pinaagi sa tabang sa nagkadaiyang human rights groups.
Mahibaloan nga ilaha pang sutaon pag-ayo ang matag kaso ug pangalan nga ilang nakuha aron maseguro nga hapsay ug legal ang tanang aspeto sa maong proseso. (riza budlao)
