Padayon ang gihimong pagpanubay sa National Bureau of Investigation o NBI sa nahimutangan ni Senator Ronald “Bato” Dela Rosa.
Gipadayag ni NBI Director Atty. Melvin Matibag nga adlaw-adlaw silang nagadawat og mga report ug impormasyon nga ilang seryosong giproseso ug gi-validate.
Sumala kaniya, adunay gipahinungod nga “dedicated team” nga eksklusibong nagtutok sa operasyon aron matultolan ang eksaktong nahimutangan sa senador ug maipatuman ang warrant sa hustong panahon.
Gipasabot ni Atty. Matibag nga dili sila mahimong modali sa pag-aksyon tungod kay kinahanglan una nilang mapamatud-an ang katinuoran sa matag impormasyon nga ilang madawat.
Matud pa niya, andam ang NBI sa paghimo og dayong operasyon sa higayon nga makabaton sila og lig-on ug mapamatud-ang basehan sa nahimutangan ni Dela Rosa.
Sa laing bahin, giingon usab ni Matibag nga adunay “strong indication” nga anaa gihapon sa nasod ang senador samtang nagpadayon ang ilang pagpangita kaniya. (jane abulag)
