Patay ang 14 ka mga lumulupyo sa Saudi Arabia human nahagsa ang usa ka helicopter nga gipanag-iya sa higanteng kompanya sa lana nga Aramco sa sidlakang baybayon.
Sumala sa taho sa state news agency, sa wala pa mawala ang signal niini, nakita sa usa ka flight tracking app nga nikalit pagliko ang helicopter, apan nagpabilin pa nga wala masusi ang hinungdan sa maong insidente.
Nahitabo kini samtang gipadayon na sa Aramco ang pagkarga og lana sa ilang terminal sa Ras Tanura human sa upat ka bulan nga pagkabalda tungod sa panagbangi sa Middle East.
Sa pagkakaron, ang Saudi Arabia ug uban pang mga nasod sa rehiyon nagpadayon sa pagpataas sa ilang produksiyon sa lana ug gas dungan sa pag-abli pag-usab sa Strait of Hormuz. (RIZA BUDLAO)
