Giangkon si Police Staff Sergeant Arla Ray Paciencia nga iyang gidala kaniadto sa firing range ang iyang pag-umangkon nga si alyas Nash tungod kay gusto unta kining mahimong pulis.
Matud niya, wala niya damha nga malambigit ang maong menor de edad sa pamusil sa San Jose National High School sa Tacloban City.
Gipasabot usab ni Paciencia nga sa adlaw sa insidente, misulod kuno si Nash sa iyang balay ug pugsanong gi pag-abli ang locker diin gitipigan ang iyang service firearm.
Giingon sa pulis nga siya lamang ang adunay yawe sa balay ug sa gun box diin gibutang ang armas.
Gidugang niya nga wala niya gamita ang standard safety vault tungod kay nagtuo siyang luwas ang pagtipig niini kay siya ra ang nagpuyo sa maong balay.
Sa pagkakaron, nagpadayon ang imbestigasyon sa mga awtoridad aron matino ang tanang kahimtang nga may kalabotan sa maong trahedya.
