Gisuspenso ni Manila Mayor Isko Moreno Domagoso ang klase sa tanang ang-ang sa mga pampubliko ug pribadong tunghaan sa Dakbayan sa Manila kagahapon.
Kini nga lakang gipatuman agig tubag sa gipaabot nga lihok-protesta sa mga miyembro sa Iglesia ni Cristo (INC) diha sa Liwasang Bonifacio.
Sumala sa lokal nga kagamhanan, tumong niini nga malikayan ang posibleng kahuot sa trapiko ug uban pang kahasol sa pagbiyahe nga mahimong mugnaon sa maong panagtapok.
Gipasiugda sa administrasyon ni Mayor Domagoso nga prayoridad nila ang kaluwasan ug seguridad sa mga estudyante, mga magtutudlo, ug sa kinatibuk-ang publiko.
Giawhag usab sa mga otoridad ang mga residente ug mga motorista nga magpabilin nga mabinantayon sa mga anunsyo ug likayan ang mga dalan nga apektado sa maong protesta aron dili ma-trap sa kahuot sa dagan sa mga sakyanan.
