5 ka tawo ang kumpirmadong patay ug dul-an 16 ang naangol human milamoy ang dakong sunog sa usa ka 10 ka andana nga apartment building sa Linkeroever district sa Antwerp, Belgium, kagahapon adlawa.
Base sa inisyal nga imbestigasyon sa mga awtoridad, gituohang nagsugod ang sunog tungod sa usa ka technical problem sa ground floor sa maong building.
Dali nga mikatag ang kalayo ug aso, maong gipahigayon dayon ang pagpa bakwit sa kapin 200 ka residente nga nagpuyo sa 80 ka apartment.
Paspas usab nga mitubag ang mga bombero ug uban pang emergency responders aron luwason ang mga residente nga naipit sa sulod sa building.
Ang mga naangol gidala dayun sa balay tambalanan alang sa pagtambal, samtang nagpadayon ang imbestigasyon sa mga awtoridad aron matino ang eksaktong hinungdan sa sunog.
