Gisaway ni ACT Teachers Party-list Rep. Antonio Tinio ang pagklasipika sa World Bank sa Pilipinas isip usa ka ‘upper-middle-income country’, tungod kay matod pa niya, wala kini nagpakita sa tinuod nga kahimtang sa mga mamumuo.
Matod sa kongresista, layo kaayo ang minimum nga adlawang suhol sa pipila ka mga lugar nga mokabat og ₱510 kon itandi kini sa gikinahanglang living wage nga ₱1,312 aron mabuhi og tarong ang usa ka pamilya.
Iyang gipasabot nga ang pipila ka mga bilyonaryo ug dagkong negosyante ray nakasapi sa pag-uswag sa ekonomiya, samtang nagpabiling kabos ug nag-antos sa kagutom ang kadaghanang Pilipino.
Tungod niini, gihangyo ni Tinio ang kagamhanan nga unahon ang pagpasa sa House Bill No. 202 o ang ₱1,200 Living Wage Bill aron mahatagan og makiangayong solusyon ang pangihanglan sa mga trabahante.
