Mubiyahe si Presidente Ferdinand Marcos Jr. padulong sa Singapore alang sa usa ka working visit sugod karong adlawa, Hulyo 14 hangtod 16 aron mas mapalig-on ang bilateral relations sa duha ka nasod, ilabi na nga giingong ang Singapore ang mosunod nga mangulo sa ASEAN.
Kini ang gi-anunsyo ni Palace Press Officer Claire Castro, sumala niya, makigtigom ang Pangulo kang Singapore Prime Minister Lawrence Wong aron hisgutan ang pagpalapad sa kooperasyon sa negosyo, pamuhunan, kinaiyahan, panglawas, ug regional stability.
Gawas niini, giingong mosalmot sab si Marcos sa private roundtable sa Milken Institute uban ang mga business leaders aron isulong ang pamuhunan o investment sa Pilipinas human kini mailhang usa ka upper-middle-income country.
Samtang, giingong mopaambit usab og mensahe si First Lady Liza Araneta-Marcos sa Global Economic Cooperation East Summit human sa imbitasyon gikan sa Future Economic Cooperation Council. (riza budlao)
