Misaka pa sa kapin ₱12.50 milyon ang kantidad sa kadaot nga natala sa sektor sa agrikultura tungod sa bagyong Inday, sumala sa Department of Agriculture (DA).
Ang kalamidad mi-apektar sa 1,078 ka mga mag-uuma nga nagdumala sa kapin 500 ektarya nga agricultural areas sa upat ka rehiyon sa nasud.
Base sa inisyal nga assessment sa DA Disaster Risk Reduction and Management Operations Center, naapektuhan ang mga rehiyon sa Calabarzon, Mimaropa, Western Visayas, ug Negros Island Region, diin nawala ang kapin 107 metric tons nga produksiyon nga kasamtangan pang gi-validate.
Gilauman nga mosaka pa ang kantidad sa kadaot ug pagkalugi samtang nagpadayon ang mas lawom nga assessment ug validation sa mga lugar nga naapektuhan.
Agig tubag, naglatag na ang DA og mga interbensiyon sama sa agricultural inputs, Survival and Recovery Loan Program, ug indemnification alang sa mga insured farmers nga naapektuhan sa habagat ug sa bagyong Inday.
