Nakumpiskar sa Police Regional Office 10 (PRO10) ang gidudahang ismagol nga sigarilyo nga nagkantidad sa P1.2 milyon atol sa gilusad nga anti-smuggling operation alas 1:50 sa hapon, Hulyo 16, 2026, sa Purok 5, Sitio Mapalad, National Highway, Barangay Dalipuga, Iligan City
Gipahunong sa kapulisan ang usa ka puti nga refrigerated van truck nga molabay unta sa Dalipuga Checkpoint ug nakit-an sa plain view ang daghang kahon sa “PRAGON” brand sigarilyo.
Lakip sa nasikop ang drayber nga naila sa alias “Rolly,” 37 anyos, minyo, residente sa Midsalip, Zamboanga del Sur, ug ang pasahero nga si alias “Larry,” 33 anyos, minyo, residente sa Baroy, Lanao del Norte.
Nasuta sa inisyal nga imbestigasyon nga gikan sa Pagadian City ang truck aron mag-deliver sa spice products ug pagkahuman niini gikuha ang sigarilyo alang sa transport.
Wala makapakita sa importation documents, Bureau of Customs clearance, tax stamps, o ebidensya sa bayad sa customs duties ug internal revenue taxes ang mga sakay sa truck, hinungdan nga gikompiskar ang mga items tungod sa paglapas sa Republic Act No. 10863 o Customs Modernization and Tariff Act ug sa National Internal Revenue Code.
Narekober sulod sa van ang 1,500 reams sa “PRAGON” brand sigarilyo nga nagkantidad sa PhP1,200,000.00 ug usa ka Isuzu refrigerated van truck nga iturn-over sa Bureau of Customs alang sa hustong dokumentasyon, pag-amping, ug angay nga proseso.
