Nabaraw sa 1st Provincial Mobile Force Company (PMFC) sa Lanao del Norte Police Provincial Office (LDN PPO) ang gidudahang illegal nga pagbiyahe sa mga mineral ores nga nagkantidad sa P1.75 milyon.
Lakip sa nadakpan ang duha ka indibidwal atol sa operasyon kontra illegal mining didto sa Brgy. Samburon, Linamon, Lanao del Norte.
Subay sa report, gipahunong ang usa ka puti nga Hino wing van truck ug nasuta nga ang drayber wala nagsul-ob sa seatbelt, walay valid driver’s license, ug giusab ang kolor sa sakyanan nga wala’y awtorisasyon.
Kini ang rason nga gi-impound ang sakyanan ug gihatagan sa Temporary Operator’s Permit.
Atol sa pagsusi sa unod sa sakyanan, nadiskobrehan sa kapulisan nga gikarga niini ang 350 ka sako nga gidudahang adunay sulod nga mineral ores nga nagkantidad og PhP1,750,000.00.
Wala gihapo’y mapakita nga dokumento ang drayber sa truck.
Una niini, gisaysay sa dinakpan nga gikan sila nagtransport sa mga kargamento sa Dumingag, Zamboanga del Sur ang mga ores ug tuyo unta nga dad-on sa Tagoloan, Misamis Oriental apan tungod kay sobra sa 30 tonelada ang timbang, gipadala kini sa barge gikan Ozamiz City paingon Kolambugan, Lanao del Norte ug nadakpan sa Linamon.
Ang mga suspek naila sa alyas nga “Rick,” 25 anyos, minyo, taga Manolo Fortich, Bukidnon ug si alias “Mark,” 20 anyos, ulitawo, taga Tagoloan, Misamis Oriental.
Ang duruha pulos gibalhog sa Linamon Municipal Police Station alang sa hustong dokumentasyon ug posibleng kaso sa paglapas sa Republic Act No. 7942 o Philippine Mining Act of 1995
Samtang ang nakumpiskar nga mineral ores ug Hino wing van truck nagpabilin sa kustodiya sa 1st PMFC, LDN PPO alang sa dokumentasyon, pag-amping, ug megascopic analysis sa Mines and Geosciences Bureau (MGB) Region 10.
