Hini-usang gikondinar sa Department of National Defense ug ni Philippine Coast Guard (PCG) West Philippine Sea Spokesperson Rear Admiral Jay Tarriela ang pagtratar sa mga Pilipino isip mga onggoy, subay sa labing lab-as nga AI-Generated Video sa China Daily.
Subay sa lab-as nga pahayag ni Tarriela iyang gibutyag nga dili niya itugot nga tawgon siya ug ang tibuok katawhang Pilipino nga “onggoy” sa gobyerno sa China.
Iyang gitataw nga bisan pa man nga adunay mga Pilipino nga pro-China o misuporta sa Beijing, klaro nga usa ka dakong insulto sa tibuok kaliwat ang gihimong video sa maong nasod.
Hisayran nga kung subayon ang kontrobersyal nga bidyo, gipakita sa China Daily Post ang usa ka onggoy nga nagsul-ob sa barong Tagalog, adunay lumad nga kalo, ug gihulagway nga maayo kaayong mokanta sa karaoke.
Alang kang Tarriela, kining maong dautang paghulagway tataw nga nagpunting ug nag-biaybiay sa dungog ug kultura sa mga Pilipino.
Busa, iyang gipanawagan nga dili angay palampason kining grabe nga pag-insulto sa atong nasudnong pagkatawo bisan pa man sa nagkalain-laing baruganan sa politika.
