Bukas ang Department of Energy (DOE) sa ipahigayon nga imbestigasyon sa Senado aron mas masabtan sa publiko kung duna ba’y mga sayop sa kasamtangang mga polisiya o regulasyon sa nasod.
Gibutyag ni Department of Energy Secretary Sharon Garin dako’g ikatabang kini nga pakisusi aron mapalambo pa ang ilang serbisyo ngadto sa mga konsumidor.
Gidugang niini nga kinahanglan kanunay magmabinantayon ang publiko sa mga desisyon sa mga pampublikong utilitidad nga nagserbisyo sa katawhan.
Pinaagi niini nga imbestigasyon, mas mapalig-on ang pag-monitor ug pagpatuman sa husto nga mga lagda sa enerhiya.
Giklaro usab sa opisyal nga ang maong lakang wala magpasabot nga sad-an na daan ang mga distribution utilities o mga kooperatiba sa kuryente sa nasod.
Mahinumduman nga gikuwestiyon ang DOE kung nganong wala silay aksyon sa pahutak nga pagpasaka sa singil sa mga electric distributors sa mga konsumidor sa managlahing bahin sa Pilipinas.
