Giklaro ni Atty. James T. Reserva nga dili basta-basta ma-impeach ang usa ka opisyal sa gobyerno tungod kay adunay gitakdang limitasyon ang balaod.
Matod niya, ang mahimong ma-impeach lamang mao ang Presidente, Bise Presidente, mga Mahistrado sa Korte Suprema, mga Chairperson ug Commissioner sa Constitutional Commissions, ug ang Ombudsman.
Gipasabot usab niya nga dili mahimong i-apil sa impeachment ang mga lihok ni Bise Presidente Sara Duterte nga nahitabo sa wala pa siya makalingkod isip Bise Presidente niadtong tuig 2022.
Sumala sa abogado, ang impeachment mahimong ibase lamang sa mga binuhatan nga nahimo sa usa ka opisyal samtang naglingkod siya isip impeachable official.
Giingon niya nga kini nga limitasyon nagsunod sa mga prinsipyo nga gilatid sa Korte Suprema aron masiguro nga adunay lig-on ug hustong legal nga basehan ang impeachment. (JANE ABULAG)
