Wala pa gani ang adlaw sa SONA ni Presidente Ferdinand Marcos Jr., gipalanog na sa pundok sa August Twenty-One Movement kon ATOM ang ilang panawagan sa pagpanubag batok sa mga anomalya sa nasud pinaagi sa ilang gihimong “Roar Against Corruption” o “Lakad para sa LABAN ” didto sa Ayala Avenue, Makati City sa kaulohan.
Sa maong kalihokan, gipaninggit sa mga miyembro sa pundok nga gihalad nila ang maong protesta ngadto sa yumaong si Reli German, kinsa usa ka haligi sa demokratikong pakigbisog sa Pilipinas ug usa sa mga nagdala sa pundok sa ATOM nga nakatampo sa EDSA People Power Revolution.
Gani, daghang mga partisipante ang nagsulot og mga sinina nga nagdala sa iyang pangalan.
Natapos ang ilang programa sa Ninoy Aquino Monument diin gipalig-on pa gyud nila ang ilang panawagan batok sa katiwalian sa tibuok nasud.
