Gikondenar sa pundok sa Federation of Free Workers (FFW) ang tataw nga diskriminasyon sa minimum wage tali sa Metro Manila ug sa mga rehiyon samtang pareho ra ang presyo sa mga palaliton.
Matud pa ni Atty. Sonny Matula, National President sa maong pundok, samtang ang kasamtangang sweldo sa Metro Manila kay anaa sa 755 pesos, mas ubos hinuon ang mga dapit nga layo sa sentro, sama nalamang sa Agusan del Sur nga anaa lang sa 440 hangtod 470 pesos ug sa Sulu nga anaa sa 386 pesos lamang.
Dugang pa niya, bisan pa man og mas gamay ang sweldo sa mga probinsya, nagpabiling pareho o mas mahal pa ang presyo sa mga basic commodities sama sa bugas, gasolina, ug kuryente kung itandi sa kaulohan.
Busa, gipunto ni Atty. Matula nga angay tutokan ang maong dakong kalainan sa suholan tungod kay wala kini mahisgutan sa nasangpit nga SONA sa Presidente.
