Gipamugos ni Prosecution Panel Spokesperson Robert Ace Barbers nga adunay lig-on ug bug-at nga ebidensiya nga nagpaluyo sa probisyon sa Article 1 sa Articles of Impeachment batok sa Bise Presidente Sara Duterte bahin sa dili hustong paggamit sa confidential and intelligence funds (CFs and IFs).
Sa exclusive interview sa BOMBO RADYO miingon si Barbers nga giklaro sa Joint Circular ang mga eksaktong listahan ug mga items nga angay lamang gastuhan sa CFs.
Dugang pa ni Barbers, nga nag pagsupak sa giya, nagpakita sa ilegal ug irregular nga pagpaggawas sa pondo nga miabot sa pinal nga kantidad nga ₱612.5 milyon.
Gibatbat usab niini nga dili basta-basta o chismis lamang ang maong mga alegasyon tungod kay kompleto kini sa mga dokumento ug ebidensiyang gipresentar sa ilang panel.
Gipasabot usab sa tigpamaba nga ang maong dakong kantidad nagkinahanglan sa tinud-anay nga pagpasabot aron masayud ang publiko kung asa gyud kini napadulong.
Nagtoo si Barbers nga bug-at nga puntos sa prosekusyon ang pagbutyag ni Office of the Vice President (OVP) Special Disbursement officer (SDO) Gina Acosta nga si VP Sara ang nagsugo kaniya nga ihatag kang Colonel Raymond Dante Lachica ang salapi nga P125-Milyon nga na-encash sa Landbank of Philippines niadtong Disyembre 2022.
Si lachica maoy kaniadto commanding officer sa Vice Presidential Security and Protection Group (VPSPG) ug security officer sa OVP.
