Milampus ang mga sakop sa Police Regional Office 10 sa pagpakgang sa laing hugna sa ilegal nga pagmina-mina sa Sitio Sendong, Barangay Tumpagon.
Namahayag si PRO-10 Spokesperson Police Major Joan Navarro nga gikustodiya na sa kapulisan ang upat ka hydraulic excavators nga gibanabana ang kantidad sa ₱28 milyon atol sa operasyon batok sa giingong illegal mining sa Cagayan de Oro City niadtong Lunes, Agosto 17.
Ang operasyon gipahigayon gipanguluhan sa Police Station 8 uban sa Mines and Geosciences Bureau Region X (MGB-10) ug mga opisyales sa barangay.
Ang maong mga ekipo nakit-an sa lugar nga adunay ebidensya sa bag-ong pagkalot ug kalihokan nga may kalabotan sa pagmina-mina.
Ang upat ka excavators gi-secure alang sa dokumentasyon ug inventory ug magpabilin nga subject sa technical verification ug hustong disposisyon sa MGB-10 subay sa Republic Act No. 7942 o Philippine Mining Act of 1995.
Subay sa report, adunay mga indibidwal nga naa sa lugar apan milayas sa wala pa madtino nga direksyon busa walay nadakpan ang mga otoridad.
